Impeksa ni Department of Finance (DOF) Secretary Ralph Recto a posible a dumanon iti P20 trillion ti utang ti pagilian a Pilipinas kalpasan ti administrasyon ni President Ferdinand Marcos Jr. inton tawen 2028.
Sigun kenni Recto kabayatan ti panakaituloy ti deliberasyon para iti singasing a P6.352 trillion national budget a dumanon iti agarup P15 trillion ti utang ti pagilian iti agdama.
Para iti umuna a kagidua ti agdama a tawen, ti debt-to-gross domestic product (GDP) ratio ti pagilian ket 60.9%, nabbaba nu idilig iti 61% idi ngudo ti Hunyo idi napalabas a tawen.
Maipalagip a dumanon iti P367 billion ti utang ti pagilian idi administrasyon ni sigud a President Ferdinand Marcos Sr.; P739 billion idi administrasyon ni sigud a President Corazon Aquino; P1.420 trillion idi administrasyon ni sigud a President Fidel Ramos ken nagbalin a P13.4 trillion ti utang ti pagilian idi administrasyon ni sigud a President Rodrigo Duterte.
