Ad-adda a ngimmato ti sovereign debt wenno utang ti Pilipinas iti P16.63 trillion idi ngudo ti Pebrero, sigun ti Bureau of Treasury ita nga aldaw.
Ti bilang ket P319.26 bilion, wenno 1.96 porsiento a nangatngato no idilig iti ngudo ti Enero, gaputa ad-adu ti binulod ti gobierno a mangsuporta iti ad-adu a programa ken proyekto ti publiko.
Iti umuna a dua a bulan ti agdama a tawen, ti utang ti Pilipinas ket ngimmato iti P589.73 billion wenno 3.62 percent.
Kinuna ti nasao nga ahensia a nangatngato pay koma ti bilang no saan a gapu iti panagngato ti piso kontra iti doliar, a nangbalbaliw kadagiti nainayon a pautang.
Kabayatanna, no maipapan iti bingay, dumanon ti domestic debt iti 67.5 a porsiento iti “total obligations,” bayat a ti foreign debt ket 32.5 a porsiento ti pakabuklanna.
Sigun kadagiti economic managers ti Pilipinas, agtaltalinaed a “manageable” ti utang ti Pilipinas iti baet ti panagngato sipud idi pandemic.
Kinuna ni Finance Secretary Ralph Recto a no la ketdi naparpartak ti panagdur-as ti ekonomia ti pagilian ngem ti utang, bassit laeng ti pakadanagan ti Pilipinas.
