BAGUIO CITY – Agtultuloy ti validation nga isaysayangkat ti Department of Social Welfare and Development – Cordillera kadagiti posible nga agbalin a benipisaryo ti Unconditional Cash Transfer (UCT) Program.
Sigun kenni Theodore Solang, Listahanan Regional Field Coordinator ti nasao nga ahensia, agtaud dagiti benipisaryo ti UCT Program kadagiti nakalista a pamilya iti sidong ti Pantawid Pamilyang Pilipino Program, dagiti napili a benipisaryo ti Social Pension Program for Indigent Senior Citizens ken ti dagiti non-pantawid beneficiaries iti sidong ti Listahanan.
Dinakamatna a manarimaan ita ti validation ti ahensia kadagiti agbalin a benipisaryo ti UCT Program kas sadiay Badeo [BADEW] ken Tacadang iti Kibungan ken Kayapa, Bakun iti probinsia ti Benguet.
Naamuan a dumanon iti agarup 31,000 a nakukurapay iti rehion manipud iti Listahanan ti maipaspasidong iti validation para iti panakaipaay ti cash grant kadagitoy malaksid pay iti nasurok 66,000 iti Social Pension ken nasurok 62,000 iti 4Ps.
Innayonna nga addan dagiti naipaayan ti cash grant kadagiti benipisaryo ti Pantawid.
Inaklonna pay a kurang ti pondo ita isut gapuna a saan nga amin ket naipaayan ti cash grant iti sidong ti UCT Program ken adda laeng dagiti naipangruna a maipaayan.
Sagudayen ti UCT Program a maipaayan dagiti nakukurapay a pamilya iti subsidiya manipud iti gobyerno gapu iti epekto ti panagngina dagiti gagatangen.
