BAGUIO CITy – Nakemmeg ti maysa a vegetable packer gapu iti panagtakawna iti dua a kawitan sadiay Pico, La Trinidad, Benguet.
Nabigbig daytoy a ni Gary Barbosa, 21-anyos, baro ken residente ti Betag, La Trinidad, Benguet.
Maibasar iti report, intali ti biktima a ni Diego Gloria, 44-anyos ti dua a kawitanna nga aggatad iti sag-P10,000 iti likod ti pagab-abanganda a balay ken nagturong daytoy iti garden.
Nupay kasta, idi nagawid ti biktima ket nasabatna ti suspek a nakaiggem iti dua a kawitan.
Dagus a nagturong iti nangitaliyanna iti kawitanna ngem sadiay a nadiskubrena a mapukpukawen dagitoy.
Inawaganna ti imatang ti suspek ngem timmaray ti suspek paturong iti Barangay Betag isut gapuna a nagpatulong ti biktima kadagiti kakaduana iti Strawberry Farm.
Nasabat met dagitoy ti suspek bayat ti panagrikrukosda iti deppaar ti BAPTC isut gapuna a kinemmegda daytoy ken nag-ayabda iti pulis.
Nupay kasta, saan a narekober ti dua a kawitan a tinakaw ti suspek.
