BAGUIO CITY – Dumanon iti 1.1 a tonelada a vegetable salad ti maiparang iti publiko iti kaunaan a panakarambak ti Foundation Day ti La Trinidad Vegetable Trading Post inton July 13, aldaw ti Thursday.
Segun kenni Agot Balanoy, representative ti liga dagiti asosasyon iti trading post, nakipatang dagitoy iti maysa a pribado a pagadalan tapnu dagitoy ti tumulong kadakuada iti panakaaramid ti dakkel a vegetable salad.
Kinunana a dagiti kangrunaan a ramen ti nasao a salad ket kamatis, patatas ken karot.
Dinakamatna a saanda nga iserrek iti Guinness World Records ti nasao a salad gaputa iti agdama ket 20 a tonelada a veggie salad ti naka-iggem iti nasao a rekord.
Naamuan a ti orihinal a planoda ket 25 a tonelada ngem kurang ti pondo dagitoy isut gapuna a pinagbalinda a 1.1 a tonelada.
Innayonna a madalusan ti Bagsakan Area gaputa sadiay a maaramid ti nasao a vegetable salad.
Maituloy met latta ti transaksyon iti uneg ti trading post iti baet nga adda dagiti aktibidad nga ipatungpal dagitoy kabayatan ti anibersaryo sadiay.
