BAGUIO CITY – Sumangsango iti nagtutuon a kaso ti nakemmeg a vendor gapu iti maatap a panangkawtibo ken panangramesna iti maysa a balasitang sadiay Km. 3, Asin Road, Baguio City itay laeng nabiit.
Maibasar iti report ti Baguio City Police Office (BCPO), rabii ti Huwebes ket nagturong ti maysa nga agasawa iti istasyon ti BCPO – Station 7 tapnu ireport a mapukpukaw ti balasitang nga anakda nga 11-anyos ken estudyante ti elementarya.
Nangisayangkat met dagiti pulis iti follow-up investigation ken sadiay a nakita iti video footage ti CCTV camera a nakamuntar iti overpass ti Maharlika ti panaglugan ti suspek ken ti balasitang iti taxi sadiay Abanao Street.
Impakita met dagiti otoridad ti video footage kadagiti agilaklako iti deppaar ti Baguio City Public Market ken maysa kadagitoy ti nakabigbig iti suspek.
Dagus a nagturong dagiti pulis ken ti nasao a vendor iti pagab-abangan ti suspek sadiay Km. 3, Asin Road ken sadiay a nadanunanda dagiti dua.
Kinemmeg dagiti pulis ti suspek a nabigbig a ni Sammy Nonog Pacle, 27-anyos, baro, vendor ken tubo ti Naguilian, La Union bayat nga inispalda ti biktima.
Naduktalan iti kanayonan nga imbestigasyon a binutbuteng ti suspek ti biktima babaen iti panangipangtana a papatayenna ti biktima no saan a sumurot daytoy kenkuana.
Inserbi met laeng dagiti pulis ti warrant of arrest ni Pacle nga impaulog ni Presiding Judge Ferdinand A. Fe ti RTC Branch 67, Bauang, La Union gapu iti kaso daytoy a panagrames nga awanan ti piyansa.
