BAGUIO CITY – Nakemmeg ti maysa a fruit vendor kalpasan a tinakawna ti maysa a paris ti sapatos manipud iti maysa a balay sadiay Central Buyagan, Poblacion, La Trinidad, Benguet idi kanikadua.
Nabigbig daytoy a ni Judith Dagupen, 22-anyos, awanan asawa, tubo ti Sadanga, Mt. Province ken residente ti East Quirino Hill, Baguio City bayat a nabigbig ti biktimana a ni Germilyn Bugtong, 26-anyos, naasawaan, self-employed ken agnanaed iti nasao a lugar.
Maibasar iti report, imbati ti biktima ti kwartona ken kalpasan ti maysa nga oras ket nagsubli.
Nupay kasta, kabayatan ti panagawidna ket nasabatna ti suspek a nang-i-iggem iti sapatosna nga aggatad iti P4,000 a nakakabil iti maysa a transparent ecobag.
Dinamag ti biktima no nagalaan ti suspek iti nasao a sapatos ngem imbaga ti suspek nga inted daytoy ti kadkadwana ngem impetteng ti biktima a tagikuana ti nasao a sapatos ken idi kinitana ti sapatos ket adda iti uneg daytoy ti medyas nga imbatina.
Nangitunda daytoy tapnu iggeman ti biktima ti suspek ken nagpaayab iti pulis.