BAGUIO CITY – Natiliw ti maysa nga Street Level Individual iti buy-bust operation a naipatungpal sadiay Brent Road, Teachers’ Camp-Cabinet Hill, Baguio City idi kalman.
Nabigbig daytoy a ni Jose Quezada Jr. alyas Mang Ose, 37-anyos, baro, vendor, tubo ti Santa Cruz, Ilocos Sur ken agnanaed sadiay Purok 15, Irisan, Baguio City.
Nakumpiskar kenkuana ti dua a pakete ti maatap a shabu nga agdagsen ti maysa a gramo, ti naaramat a buy-bust money ken cellphone ken sumagmamano a drug paraphernalias.
Naamoan nga aktibo nga adda ti pakainaigan ti suspek iti panagraira ti iligal a droga partikular ti shabu iti Baguio City.
Sigud pay daytoy a nakasuan ti grave threat idi 2014 ngem nawaya-wayaan.
Manamnama a mapilaan ni Quezada Jr. iti kaso a panaglabsing iti Comprehensive Dangerous Drugs Act of 2002.
