Impetteng ni Benguet Vice Governor Marie Rose Fongwan Kepes a supsuportaran na ti ilablaban dagiti kaaduan wenno ti residente ti Guinaoang ken Bulalacao kontra iti panagminas.
Daytoy ket maipanggep iti agdama nga isyu ti panggep a drilling exploration idiay Mankayanan, banag a saan nga anamongan dagiti residente sadiay.
Iti pannakipatang ti Bombo Radyo kenni Vice Governor Kepes, dinakamatna a naadaan dagitoy iti gundaway a bumisita idiay Guinaoang ken Bulalacao itay nabiit no sadino nakitana a kaaduwan kadagiti pasdek idiay ket taltalon wenno garden.
Gapu iti daytoy, imbinglay ti bise-gobernador a suportaran kitdi ti dinakamatna a ‘green gold’ wenno agrikultura iti nasao a lugar.
Impettengna metlaeng a suportaranna nu anya ti kayat dagiti kaaduan nangnangruna nu kinatalna ken kapia ti mapagtutungtongan.
Sigun pay kenni Vice Governor Kepes, nupay adda ti maaw-awagan a responsible mining, impettengna nga panag-garden pay laeng ti pilien dagiti residente sadiay ken saan a mining, banag a suportaran unay ti nasao nga opisyal.
Kagidan dayta, impakaammo ni Benguet Vice Governor Marie Rose Fongwan Kepes a nakaipaayda iti kanayunan a tulong kadagiti mannalon idiay Buguias ken Mankayan.
Sigun kenni Vice Governor Kepes, agarup 1,100 a mannalon ti naipaayan ti tulong idiay Buguias bayat a 700 met idiay Mankayan.
Ti naaramat a pundo para iti nasao a programa ket manipud pay iti Calamity Fund.
Innayon metlaeng daytoy a puntiryada a makaipaay iti tulong iti pakabuklan a bilang a 4000 a mannalon aramat latta ti Calamity Fund. //bombokaren.c.sapirao