Impetteng ni Vice President Sara Duterte a kabaelan latta ti opisinana nga agtrabaho ken ag-operate uray awan ti pundo a mailatang para kadakuada inton 2025.
Sigun kenni Duterte, nangngegna a pagsarsaritaan dagiti House of Representatives ti pannaikkat ti pundo wenno pannakakessay ti pundo ti opisinana inton umay a tawen.
Imbaga met ti bise presidente a paset daytoy ti panang-atake dagiti kongresista kenkuana.
Maipalagip nga idi Martes ket intantan manen ti House appropriations panel iti maika-dua a gundaway ti committee-level deliberations para iti naisingasing a P2 billion a pundo iti opisina ti bise presidente inton umay a tawen.
Daytoy ket kalpasan a saan a dimmar-ay ni Duterte wenno ti empleyadona iti pannaikatuloy ti House panel’s deliberation para iti naisingasing a pundo iti opisinana.
Immunan a pinagkedkedan ti bise presidente iti umuna a House panel deliberations a sungbatan dagiti saludsod dagiti mammanday-linteg maipapan iti nakaaramatan ti P125 million ken P500 million a confidential fund allocation ti opisinana idi tawen 2022 ken 2023.
