Nangipaay ti mensahe ni Vice President Sara Duterte kadagiti kritikona, nu sadinno kinunana a saanna a pakawanen wenno malipatan dagitoy kasaruno ti pannakaipila ti impeachment complaint kontra kenkuana iti House of Representatives.
Iti panagbitlana iti maysa nga programa a mangmarka iti selebrasion ti anibersario ti Office of the Vice President (OVP) sadiay Ifugao, impalagip ni Vice President Duterte kadagiti agdingdinggeg a ti Paskua ket panawen ti panangted ken panagayat.
Nupay kasta, inlawlawagna a saanna a panggep nga ipaay ti pammakawan ita a Yuletide season.
Kagiddan ti panagsaritaran, nagkatawa met dagiti agdingdinggeg.
“Dahil ako ay Vice President, kailangan kong sabihin sa inyo na ‘yan ang mensahe at diwa ng Pasko. Pero po ako, hindi po talaga ako magpapatawad.”
Vice President Sara Duterte
Dinakamatna a nagduduma dagiti indibidual iti panagtaripato iti pungtot a sigun kenkuana ket adda dagiti nalaka nga agpakawan, adda met dagiti nabayag ken adda met dagiti dadduma nga agingga patay ket maitugotda ti pungtot.
Ti kinuna ni Duterte ket gapu iti kumarkaro a tension kasaruno ti impeachment complaint a naipila kontra kenkuana dagiti civil society groups itay kanikadua.
Nakalanad iti reklamo nga agur-urnong ni Vice President ti saan a mailawlawag a kinabaknangna, saan a nasayaat a panangusar iti pondo ti gobierno, ken mapapati a pannakairamanna iti extrajudicial killings dagiti drug suspects.
Itay laeng kallabes, inladawan ni Vice President Duterte ti relasionda kenni President Ferdinand Marcos Jr. a nakadanonen iti “point of no return” iti tengga ti agtultuloy a panagimbestigar ti pondo ti Office of the Vice President ket ti pondo ti Department of Education bayat ti panagtakemna kas Education Secretary.
