Impaganetget ni Vice President Sara Duterte a saan nga ‘bratinella’ wenno “spoiled brat” daytoy.
Daytoy ket iti laksid ti panangliklikna a masungbatan dagiti saludsod ti sumagmamano a mammanday-linteg kabayatan ti deliberasion iti naisingasing a 2025 budget ti Office of the Vice President (OVP).
Iti nairekord a video interview, kinuna ni Duterte a kayatna a maawatan dagiti tattao no apay a saan a sumungsungbat kadagiti saludsod bayat ti budget hearing iti House of Representatives, uray no binigbigna ti bileg ti Kongreso a mangsukimat iti naisingasing a badyet ti opisinana.
Para kenni Duterte, mabalin nga impagarup ti dadduma a mammanday-linteg kas “bratinella” gapu ta sinungbatanna dagitoy iti wagas a saanda a kayat.
Kinunana pay a ti deliberasion iti singasing ti OVP a P2.037 bilion a badyet para iti sumaruno a tawen ket us-usaren dagiti sumagmamano a kameng ti Kamara a mangbabalaw kenkuana gaputa saandan nga kaalyado iti politika.
Impaganetget pay ti Bise Presidente ti kinapateg ti pannakaammo ti publiko iti singasing ti badyet ti Office of the Vice President, a sigun kenkuana ket naipablaak iti website ken social media page ti OVP.
Itay laeng nabiit, naitantan ti House committee on appropriations ti deliberasion iti budget ti opisina ti bise presidente iti baet ti panagkedked ni Duterte a mangsungbat no kasano nga usaren ti opisinana ti badyet daytoy.
