Impeksa ni Vice President Sara Duterte a maasian iti pannakibiangda kadagiti opisial ti Office of the Vice President (OVP).
Sigun kenni Vice President Sara, ti dakkel a karit a sangsanguenna ket ti staff daytoy a mairamraman iti agtultuloy nga imbestigasion ti Quad Committee.
Daytoy ket kalpasan a na-“cite in contempt” ti chief of staff a ni Zuleika Lopez itay laeng kanikadua gapu iti surat a pinirmaanna a mangkidkiddaw iti Commission on Audit a saanda nga ipangag ti subpoena ti House committee a mangisubmitir kadagiti report ti audit maipapan iti OVP ken ti panagaramat ti confidential funds iti Department of Education.
Kabayatanna, sigun met kenni House Speaker Marton Romualdez, rumbeng nga agparang ni Duterte iti nasao a komite imbes a dagiti staff daytoy ti mangilawlawag nu kasano a naaramat ti confidential funds.
Maipalagip a nagparang ni Duterte iti umuna nga aldaw iti panagdinggeg ti Quad Committe ngem nagkedked daytoy nga agsapata.
Para kenni Vice Presidente Duterte, awan serserbina ti panangilawlawagna iti naisingasing a pondo ti opisinana para iti 2025 gaputa kontrolado ni Romualdez ti budget allocations.
Pinaglibakan met amin ni Romualdez ti nasao a pammabasol.
Impakaamo ni House good government and public accountability panel chairperson Manila Representative Joel Chua a ti inaramid ti Bise Presidente ket umdas tapno mapapanaw iti nasao a puesto, nupay mabalin a saan a posible gaputa asidegen ti kampania ken eleksion inton Mayo 2025.
Naituding met inton Nobiembre 25 ti sumaruno a panagdinggeg ti Quad Committee maipapan iti Office of the Vice Presidente ken ti pannakaaramat ti pondo ti Department of Eduction.
Iti agtultuloy a panagdinggeg ti nasao a komite, naduktalan dagiti mammanday linteg nga inaramat ti Office of the Vice President ti P16 milion manipod iti P125 milion a confidential fund para iti “safehouses” idi tawen 2022.
Malaksid iti dayta, nangisubmitir ni Vice President Duterte iti sidong ti Department of Education kadagiti “certifications” manipod kadagiti opisial ti militar tapno maikalintegan ti panagusar iti “confidential funds” nga awan ti pammalubos dagiti kameng ti militar ken nangisubmitir pay ti Office of the Vice President ken Department of Education iti acknowledgement receipts a saan a pudno ti petsa, “signatories,” ken saan a mabasa a signatories idi tawen 2022 ken 2023.
