Nangipaay ni Vice President ita nga aldaw iti statementna mainaig iti naipatungpal a warrant of arrest kontra kenni Apollo Quiboloy iti Kingdom of Jesus Christ Compound sadiay Davao City idi laeng kalman.
Maibasar iti surat ni Vice President Duterte, saanna a lapdan ti pannakaipatungpal ti aniaman a warrant of arrest a maitunos iti linteg.
Nupay kasta, saanna a kanunungan ti panakaaramat ti kinaranggas kadagiti inosente nga umili ken deboto iti Kingdom of Jesus Christ(KOJC).
Impaganetget ni Duterte ti panangkondinarna iti nakaro a panangabuso iti police power iti panakaraut ti Kingdom of Jesus Christ compound idi laeng kalman a nangitunda iti pannakariribuk dagiti miembro, pannakaabuso dagiti menor de edad ken ti ipupusay ti maysa nga indibidual.
Inyunay-unay ni Duterte a ti nasao nga aramid ket saan laeng a panaglabsing iti Constitutionally-protected rights, no di ket panangliput pay iti panagtalek nga impaay ti Pilipino iti institusion.
Innayun ni Duterte a saanna a maliklikan a panunuten a maipatpatungpal ti warrant of arrest, gaputta ti akusado ket maysa a Duterte-supporter.
Kabayatanna, nagkiddaw ni Duterte iti pammakawan manipud kadagiti amin a miembro, deboto ken dadduma pay a kameng ti Kingdom of Jesus Christ iti panangguyugoy ken panagpakaasina nga ibotosda ni President Ferdinand Bongbong Marcos Jr. idi napalabas nga eleksion.
Iti maudi a paset ti surat ni Vice President Duterte, kinunana a maikari dagiti Pilipino iti nasaysayaat.
