Pabor ni Vice President Sara Duterte iti singasing a gakat nga impila ti kabsatna a ni Davao 1st District Representative Paolo Duterte, a mangimanmandato kadagiti opisial ti gobierno a “random drug testing.”
Sigun iti bise presidente, ti nasao a wagas ket maipasigurado a dagiti opisial ti gobierno ket nasayaat ti kapanunutanda iti panagserbi.
Iti House Bill No. 10744, naimandato a dagiti naibotos ken nadutukan nga opisial ti gobierno pakairamanan ti Presidente ket rumbeng a maipasidong iti random drug testing babaen ti hair follicle drug tests tunggal innem a bulan.
Naimandato metlaeng a kasapulan ti voluntary random drug testing para kadagiti agkandidato iti uneg ti siam a pulo nga aldaw sakbay ti aldaw ti Eleksion.
Dagiti maduktalan nga agpositibo ket masuspindir wenno maikkat manipod iti opisina a nagtugawanda, kas maibasar iti gakat.
Kabayatanna, immanamong ni Vice President Duterte a maipasidong daytoy iti hair follicle drug test kas karit ni sigud a Presidential spokesperson Harry Roque.
Sigun kenni Vice President Duterte, isimsimpada laeng ti petsa ken ti pakaipasidonganna a laboratorio tapno ma-validate ti resulta ti drug testing.
