Impeksa dagiti sumagmamano nga opisial ti gobierno a kasapulan nga agpaipasidung iti “psychological assessment” ni Vice President Sara Duterte, gapu kadagiti mapakadanag a pangta daytoy kenni President Ferdinand Marcos Jr. ken ti pamilia daytoy.
Maipalagip nga innaklon ni Duterte a nagballaag daytoy kenni Senator Imee Marcos a kallienna ti bangkay ti ama daytoy a ni sigud a President Ferdinand Marcos Sr. tapno ibellengna iti West Philippine Sea, no saan nga agsardeng ti political attacks manipud iti administrasion.
Inaklon pay ni Duterte nga inladawanna ti panangputedna iti ulo ni President Ferdinand Marcos Jr.
Impaganetget ni House Assistant Majority Leader ken Zambales 1st District Representative Jay Khongkun a rumbeng nga agpaipasidung iti naan-anay a “psychological assessment” ni Duterte tapno masigurado a makaserbi pay laeng daytoy iti pagilian.
Kabayatanna, kinuna ni House Assistant Majority Leader Paolo Ortega V ti La Union a maikari dagiti Pilipino kadagiti lider a natalged ti isip ken emosionna, nangruna kadagiti narigat a panawen.
