Inlawlawag idi kalman ti Armed Forces of the Philippines (AFP) a saan a nawaswas ti Vice Presidential Security and Protection Group (VPSPG).
Sigun iti AFP, ti Vice Presidential Security and Protection Group ket naorganisar manen kas AFP Security and Protection Group (AFPSPG).
Iti statement, kinuna ti nasao nga ahensia a naurnos manen ti nasao a “protection group” tapno agkaykaysa ti “security and protection operations.”
Sigun pay iti nasao nga ahensia, ti agdama a “set-up” ket ad-adda a nasaysayaat ken epektibo tapno maipasigurado ti kinatalged ken seguridad ti agdama ken iti masakbayan a Bise Presidente.
Kabayatanna, kiddaw ti Armed Forces of the Philippines iti publiko a liklikan ti agiwaras ti palso a damag.
Maipalagip a nabukel ti Vice Presidential Security and Protection Group (VPSPG) idi Hunio 2022, ken daytoy ket babaen ti panangipasigurado ti Security and Protection Battalion manipod iti AFP General Headquarters ken Headquarters Support Command, nga awan ti “dedicated” a military security group.
