BAGUIO CITY – Iya-apela ti City Administrator ti lokal a gobyerno ti Baguio ti saan a nakaro a panang-ukom ti publiko iti nagbalin a lapses ti ama ti siudad iti idadar-ay daytoy iti birthday celebration iti maysa a hotel ditoy siudad a nakitaan ti panaglabsing iti health protocols.
Iti interview ti Bombo Radyo Baguio, kinuna ni Engr. Bonifacio Dela Peña a nasken a ti kitaen ket ti maar-aramidan ti ama ti siudad para iti pagsayaatan ti Baguio nupay saan a mailibak nga adda ti nagbalin a biddut daytoy.
Kagiddan iti daytoy ket impasigurado ken inyulitna ti kinuna ni Mayor Benjamin Magalong nga awan ti mailaksid kadagiti nasken a madusa no maduktalan iti imbestigasyon nga adda a talaga ti panaglabsing iti health protocol kabayatan ti nasao a selebrasyon.
Dinakmatna nga adda dagiti pagalagadan ken ordinansa ti siudad a nakailanadan dagiti pannusa dagiti aglabsing kadagiti health protocols kontra iti COVID-19.
Dinakamatna met a manarimaan paylaeng ti imbestigasyon ti Baguio City Police Office iti insidente ken iti agdama ket partikular a suksukimaten ken iberberipikar dagiti pulis dagiti ladawan ken videos a naala sadiay.
Inlawlawagna a daytoy ket gaputa saan nga ipakpakita dagiti naala a ladawan ken videos ti sibubukel a sitwasyon idi naangay ti selebrasyon.
Impeksana pay ti inanamana nga iti kabiitan a panawen ket malpasen ti imbestigasyon.
Kabayatanna, dinakamat ni Engr. Dela Peña a dimmalan iti umno a proseso ti pasken no sadino, naipaayan daytoy ti permit isut gapuna a responsibilidad ti management ti hotel ti panakaipatungpal ti aktibidad.
Maipalagip nga iti pagalagadan ket nasken nga agala iti permit manipud iti Baguio LGU ti establishimento a pakaisayangkatan ti mass gathering a sarunuen ti inspeksion babaen kadagiti maseknan nga opisina ti Baguio LGU sakbay a maipaay ti pammalubos no makapasa daytoy.
