TABUK CITY, KALINGA – Makaaw-awat ita iti nagduduma a reaksyon ti viral video ti napasamak nga aksidente idiay Barangay Lacnog East, Tabuk City, Kalinga idi rabii, Nobyembre 12, a nakatayan ti maysa a babai.
Iti viral video, makita ti maysa a motorsiklo nga inmaneho ni Daniel Alos, 46-anyos, church preacher ken residente ti Dananao, Lacnog East ken maysa a victory liner sleeper bus nga inmaneho ni Diosdado Ortiz Valdez, 48-anyos, residente ti Quezon City.
Makita pay iti video ti panagdinnanog dagiti nagresponde nga umili ken ti panangdadaelda iti victory liner bus windshield.
Iti interview ti Bombo Radyo kenni PCapt. Ruff Manganip, Information Officer ti Kalinga Police Provincial Office, kinunana a maysa a nakitada a rason iti panangdadael dagiti sumagmamano nga umili iti windshield ti nasao a bus ket gapu iti unget dagitoy agsipud ta daytoyen ti maika-dua a gundaway nga adda ti napasamak nga aksidente iti nasao a lugar nu sadino ti biktima ket kabsat ni Daniel Alos, driver ti nasao a motorsiklo.
Inlawlawag met ni PCapt. Manganip a saanda a dagus a narespondean ti aksidente gapu ta napasamak daytoy idi 6:40 p.m ngem naireport laeng kadakuada idi alas otso ti rabii.
Dinakamatna a nagtaud ti bus idiay Bulanao, Tabuk City ken paturong idiay Metro Manila.
Bayat a daldalyasaten ti nasao a bus ti national highway, ag-overtake koma ngem killaat a nagturn-left ti motorsiklo nga addaan ti tallo a backrider rason a nadungpar dagitoy.
Nabigbig dagiti backrider a da Joy Balwog Alos, 49-anyos, Daniel Balwog Alos Jr., 8-anyos ken Kristine Balwog Alos, 10-anyos, asawa ken anak ti motorcycle driver.
Naitaray iti ospital dagiti nakalugan iti motorsiklo ngem naideklara a dead-on-arrival ni Joy Alos bayat nga agpapaagas pailaeng ti asawana a ni Daniel Alos ken natalged ti kasasaad dagiti dua nga annakda.
Maisagsagana metten ti kaso a Reckless Imprudence Resulting to Homicide with Double Serious Physical Injuries a maipila kontra iti driver ti bus.
Kabayatanna, maim-imbestigaran met dagiti indibidual a nangpang-or iti windshield ti bus gapu ta posible a makasoan dagitoy.//Bombo Rosemarie Bulsao
