Nakemmeg ti maysa a Virtual Assistant ken maysa pay a lalaki nga awanan trabaho iti drug buy -bust operation sadiay Purok 24-A, San Carlos Road, Irisan Barangay, Baguio City ita a rabii.
Dagiti nakemmeg ket lalaki nga agtawen iti 37, , homebased virtual assistant ken agdama a residente ti Bahong, La Trinidad, Benguet ken maysa pay a lalaki nga agtawen iti 28, awanan trabaho ken residente ti Purok 23, San Carlos, Irisan, Baguio City.
Nakumpiska manipud iti dua ti lima a heat sealed transparent plastic sachet a naglaon iti maatap a shabu nga adaan ti pakabuklan a timbang a 5.05 ken Standard Drug Price (SDP) a P37,400.00.
Kabayatanna, nakumpiska manipud virtual assistant ti maysa a Calibre .22 revolver nga adaan iti four rounds of complete caliber .22 ammunition.
Malaksid iti dayta, naala metleng manipud kadagiti dua a lallaki ti maysa a piraso ti original five-hundred-peso bill; tallo a piraso ti One Thousand pesos (boodle money) ; dua a piraso ti small brown envelope; maysa a selpon; como-brown belt bag; ken motor.
Balligi ti nasao nga operasyon babaen ti Baguio City Police Office -City Drug Enforcement Unit/City Intelligence Unit (Lead Units),Baguio City Police Office Station 9, Regional Police Drug Enforcement Unit ken City Intelligence Team-Baguio/Region Intelligence Unit 14.
Sumango met dagiti suspek iti kaso a panaglabsing ti RA 9165 wenno Comprehensive Dangerous Drugs Act of 2002 ken RA10591 wenno Comprehensive Firearms and Ammunition Regulation Act.
Kabayatanna, naiturnoveren dagiti naarestar a suspek ken nakumpiska a non-drug evidence iti kustodiya ti BCPO CDEU para ti umno a dokumentasyon ken disposisyon.
Maiturnover dagiti nakumpiska a drug evidence idiay Regional Forensic Unit CAR, Camp Major Bado Dangwa, La Trinidad, Benguet para ti Qualitative ken Quantitative Examination. //via Bombo Noveh Organo











