BAGUIO CITY-Ngimmato iti innem agingga iti walo a tonelada ti basura a nainayon iti kolkolektaren ti City General Services Office ita a bulan ti Pebrero kagiddan ti panakarambak ti Panagbenga 2018.
Sigun kenni Eugene Buyucan, dadaulo ti nasao nga opisina, inaldaw a makakolkolektar dagiti personnel-da iti 163 agingga 165 a tonelada ti basura manipud iti sentro ti siudad ken kadagiti 128 a babbarangay.
Kinunana a manayonan pay ti nasao a tonelada nangruna no umadon ti bilang dagiti turista iti siudad a kas naobserbaranda kadagiti napalpalabas a tawen.
Gapu iti daytoy, palpalagipan manen ni Buyucan dagiti umili ti siudad tapnu kanayonda a suruten ti umno a panagsinasina kadagiti basura ken liklikanda ti basta lattan panangibelleng iti basura kadagiti igid dagiti kalsada wenno iti sadinoman a lugar.
Impettengna a nasken a dagiti tattao a mismo ti mangdisiplina iti bukodda a bagi tapnu makatulongda iti panakapatalinaed ti kinadalus ti siudad kabayatan ti makabulan a selebrasyon ti Panagbenga.
