Mailukat iti publiko ti voter registration iti maikatlo a lawas ti Oktobre 2025, iti baet a posible a maitantan ti December 1 nga eleksion ti Barangay ken Sangguniang Kabataan (BSK).
Sigun kenni Comelec Chairman George Erwin Garcia, mairugi ti voter registration kalpasan ti Bangsamoro Parliamentary Elections.
Mangrugi iti maikatlo a lawas ti Oktobre 2025 agingga iti July 2026.
Impasigurado ni Garcia kadagiti botante nga agparehistro iti nagbaetan ti Agosto 1 agingga iti 10, 2025 nga agtalinaed a valid ti panagrehistroda ken saan a maapektaran iti petsa ti eleksion.
Kabayatanna, inlawlawag ti nasao nga opisial a ti extended registration inton sumaruno a tawen ket para kadagiti saan a nagrehisto iti naituding nga aldaw, ken dagiti botante nga ag-reactivate wenno mangiyakar kadagiti rekordda.