BAGUIO CITY – Napimpintas ti voter’s certification no idilig iti voter’s ID kas proof wenno dokumento nga iparang ti maseknan iti aniaman a transaksion daytoy.
Impeksa daytoy ni Atty. John Paul Martin, Election Officer ti COMELEC-Baguio kagiddan ti pammilin ti COMELEC Central Office a saandan a mangipaay iti voter’s ID dagiti nagparehistro manipud 2012.
Iti panakiyuman ti Bombo Radyo, kinunana a napimpintas no voter’s certification ti alaen dagiti rehistrado nga umili gaputa mas updated ken ti nasao a sertipikasyon ti mangipakita nga aktibo a botante ti maseknan nga indibidual.
Innayonna a ti laengen ipaay a voter’s ID dagiti field offices ti COMELEC ket dagiti nabatbati nga ID iti opisina dagitoy ken awanen ti maawatda nga IDs manipud iti Central Office ti komisyon.
Maipalagip nga impaulog ti COMELEC Central Office ti paka-ammo a saandan a mangimprenta iti voter’s ID dagiti nagparehistro idi 2012 gapu iti mapadpadaanan a panagbalin a linteg ti National ID System.
Sagudayen ti linteg iti National ID System a maymaysa laengen ti agbalin nga ID ti tunggal umili iti pagilian.