Manarimaan ti panakaiwaras ti Voter’s information sheet (VIS) kadagiti botante iti siudad ti Baguio.
Gapu iti dayta, nagpalagip ti Commission on Elections-Baguio kadagiti botante nga aramatenda daytoy a nalaing kas basaran iti umadanin nga eleksyon tapno naparpartak ti panagbotos dagitoy.
Iti nasao a Voter’s information sheet (VIS), addaan daytoy iti uppat a panid ken nakalanad ditoy dagiti impormasyon kas iti nagan ti botante, ti address daytoy, ti presinto ken eskwelaan a pagbotosan ti maysa a botante.
Malaksid iti dayta ket nakalanad met laeng dagiti nagan dagiti kandidato manipud iti kina-senador agingga kinakonsehal.
Nupay kasta, nagduduma ti nilaon dagiti Voter’s information sheet (VIS) kadagiti daduma a panid gapu ta nagsisinabali dagiti local candidates tunggal munisipyo, probinsya wenno siudad.
Kabayatanna, kiddaw ti Commission on Elections-Baguio ti panagkita wenno panagbantay dagiti opisyales ti tunggal barangay kadagitoy tapno personal a maiyawatda ti Voter’s information sheet (VIS) kadagiti mismo a botante.
