Al-allukoyen ni Atty. Gustavo Fernadez Dalen, Election Officer ti Bangued, Abra ti publiko nga agparehistro dagitoy a nasapsapa para iti umadanin a 2025 national ken local elections.
Iti exclusive interview ti Bombo Radyo kenni Atty. Dalen, impeksana a rumbeng a liklikan ti “last minute” a kadawyan nga ar-aramiden dagiti Pilipino.
Sigun kenkuana, tunggal madanon ti panagpaparehisto para iti eleksyon ket trend daytoy iti baet nga adu dagiti nagparehistro iti umuna a kwarter ngem bumasbassit iti katengngaanna.
Gapu iti dayta, nasken ti panakaipatungpal dagiti offsite registration tapno saan a marigatan dagiti botante nga agparehistro.
Malaksid iti dayta, kinuna ti Election Officer a mangipatpatungpal metlaeng dagitoy ti Register Everywhere para kadagiti botante a kayatda a maiyakar ti pagbotosanda wenno ti agpangpanggep nga agparehistro kadagiti sabali a lugar.
Iti agdama, mangisaysayangkat ti Commission on Elections ti offsite registration kadagiti pagadalan tapno agparehistro dagiti estudyante a mangdanon iti 18-anyos nga edad apaman a May 12, 2025, ti manamnama nga aldaw a kaipatungpalan ti nasao nga eleksyon.
Nupay kasta, inaklon ni Atty. Dalen nga agbalbalin a karit kadagitoy no kasanoda nga allukoyen dagiti estudyante nga agparehisto.
Gapu iti dayta, rumbeng ti panakaipatungpal dagiti voter’s education.
Manamnama met a sumaruno a mangisayangkat dagitoy ti offsite registration kadagiti Senior Citizens.
Kabayatanna, iti mapangpanggep a panakaiyalis ti December 1, 2025 Barangay and Sangguniang Kabataan Elections (BSKE) inton October 26, 2026 ket kinuna ni Atty. Dalen a napintas daytoy a banag gapu ta narigat ti proseso ti eleksyon para iti Barangay nangruna ket manual ti maar-aramat iti daytoy.//M
