BAGUIO CITY-Inyunay-unay manen ti COMELEC – Baguio a nakalukat ti opisinada para iti voters registration, Lunes agingga Sabado pakairamanan ti holiday, alas otso agingga alas singko ti malem.
Iti interview ti Bombo Radyo Baguio, kinuna ni Election Officer Atty. John Paul Martin, mairekep laeng ti opisinada inton Disyembre 24, Disyembre 26 ken Disyembre 31 kas maibasar iti pammilin ti central office.
Mangrugi met inton Enero 3 agingga Enero 31 ket apanda iti kadakkelan a mall iti Baguio City nga isu ti panakaipatungpalan ti voters registration.
Nupay kasta, mangipatungpalda latta ti off-site registration para kadagiti balud, senior citizen, PWDs depende iti paglakaan dagiti indibidual a karaman iti vulnerable sector.
Gapu iti daytoy, guyguyogoyen manen ni Martin dagiti umili nga agparehistroda agingga inton Enero 31 tapno makabotosda inton Oktobre dos mil baente tres.//cms