BAGUIO CITY – Maisayangkaten iti kadakkelan a mall ditoy siudad ti Baguio ti makabulan a voter’s registration ken dadduma a transaksion iti COMELEC-Baguio.
Iti interview ti Bombo Radyo Baguio, kinuna ni City Election Office Atty. John Paul Martin a manipud iti sigud a plano a Baguio Convention Center ket iti laengen nasao a mall ti pakaisayangkatan ti panagparehistro iti September 1-30.
Inlawlawagna a daytoy ket gapu kadagiti nagduduma nga aktibidad ti lokal a gobyerno ti Baguio para iti Baguio Day a maisayangkat iti nasao a convention center.
Sigun kenkuana, addan ti tulaganda iti management ti nasao a mall isut gapuna a dagiti kayatda ti agparehistro ket mapalubusan a makastrek sadiay iti alas-otso ti agsapa.
Dinakamatna a change of venue ti mapasamak isut gapuna nga awan ti tao iti opisina ti COMELEC-Baguio sadiay Governor Pack Road iti entero a bulan ti September.
Innayonna nga agpwesto dagitoy iti nagbaetan ti Cinema 1 ken Cinema 2 iti maikatlo a kadsaaran ti nasao a mall.
Aw-awisen pay ni Atty. Martin dagiti umili iti siudad iti panakipasetda iti nasao a panagparehisto nupay namnamaendan nga umado dagiti agparehistro a botante iti bulan ti voter’s registration.
Kabayatanna, maisayangkat inton September 11 ti special registration para kadagiti PWDs iti siudad.
Inlawlawag ni Atty. Martin a mailatang ti nasao nga aldaw para laeng kadagiti PWDs nangruna ta kasapulan dagitoy ti espesyal ken umno nga atension.
Dinakamatna met a mabalin latta nga agparehistro dagiti senior citizens iti normal days ngem maipaayan dagitoy iti special lane.