Impetteng ni legal counsel Paolo Panelo Jr. nga awan ti pakainaigan ni Vice President Sara Duterte iti maatap a pangta iti biag ni Ramil Madriaga.
Sigun iti legal cousel ni VP Sara a ni Panelo Jr., makikaykaysa ti kampo ni Duterte iti kiddaw a maipaay ti kanayunan a proteksion kenni Madriaga.
Innayon ni Panelo a kayatda nga agbiag ni Madriaga agsipudta, daytoy ti kakaisuna a mangaklon nga inaramidna laeng ti testimonyana kontra iti bise presidente
Malaksid iti dayta, daytoy metlaeng ti kakaisuna a posible a mangibutaktak iti kinasiasino ti handlers daytoy.
Inlawlawag ti Bureau of Jail Management and Penology (BJMP) a ti mapapati a pangta iti biag ni Madriaga ket nagtaud iti supiatda iti maysa a person deprived of liberty iti Taguig City Jail.
Kabayatanna, nangipila iti perjury complaint ni VP Duterte kontra kenni Madriaga a maatap a sigud a katulongna.
Maipalagip nga imbutaktak ni Madriaga idi Disiembre 2025 a pinondoan dagiti drug dealers ken POGO operations ti Inday Sara Duterte is My President (ISIP) Pilipinas ken dadduma pay a parallel groups.
