Kinuwestionaran dagiti mangngalap iti West Philippine Sea ni Vice President Sara Duterte no ti kuarta a maatap nga inawatna manipud sadiay China ti rason iti panagulemek daytoy iti maritime aggression ti Beijing kontra kadagiti mangngalap a Pilipino.
Iti press conference, kiniddaw dagiti mangangalap manipud sadiay Zambales ken Bataan ti nalawag a sungbat kas mangngalap a Pilipino a makapaspasar iti pammutbuteng, peggad ken restriksion kadagiti tradisional a pagtataudan ti pagbiagan dagitoy.
Direkta a kinuwestionaran ni Leonardo “Ka Nards” Cuaresma, presidente ti New Masinloc Fishermen Association ti bise presidente seknan iti naipadamag a China-linked financial transactions a nakairamanan ni Duterte ken ti asawana a ni Atty. Manases Carpio.
Sigun kenkuana, makapaspasar dagitoy iti harassment, pammutbuteng, ken dadduma pay a kinaranggas nga aramid ti Chinese vessels bayat a ti bise presidente ken ti asawana ket maatap nga immawat iti minil-milyon a kuarta manipud sadiay China.
“Hindi ba isa itong katrayduran? Hindi ba dapat ipaliwanag ito sa taumbayan?” sigun kenni Cuaresma.
