Kwenestionaran ni Vice President Sara Duterte ti kinuna dagiti sumagmamano a mammanday linteg a sigurado a maimpeach daytoy.
Sigun iti bise presidente, baybay-anda no ordinario laeng nga indibidual, kas kadagiti ordinario a Pilipino.
Nupay kasta, kinunana a sabali no maysa a kongresista wenno Senador ti mangibagbaga.
Daytoy ti kinuna ti bise presidente, kasaruno dagiti social media post a pakakitaaan nga umabante iti Senado ti impeachment complaint.
Maipalagip a nagkaykaysa ti House committee on justice nga inaprobran ti committee report ti articles of impeachment kontra kenni Duterte.
Dagiti impeachment complaints a naipila kontra iti Bise President ket maipapan iti akosasyon a betrayal of public trust, culpable violation of the Constitution, maatap a saan nga uno a pannakaramat ti P612.5 million a confidential funds ken dadduma pay.
