Saan pay a nakasagana ti Pilipinas iti giyera gaputa kurang iti plano ken direksion ti administrasion ni President Ferdinand Marcos Jr., sigun kenni Vice President Sara Duterte idi kalman.
Daytoy ti kinunana bayat ti “Free Duterte Now” rally sadiay Melbourne, Australia no sadinno, immapela daytoy kadagiti mangsupsuporta kenkuana a tumulong dagitoy iti panagregget a mangwayawaya iti amana a ni sigud a President Rodrigo Duterte a nakabalud idiay The Hague, Netherlands gapu iti reklamo a crimes against humanity.
Sigun kenni Vice President Sara Duterte, sigud daytoy a kameng ti gabinete ni President Marcos Jr. ken patienna nga awan ti direksion isut gapuna a kasapulan nga agkaykaysa tapno aggunay ti administrasion a mangipaay ti umno a karbengan ti pagilian.
Inyebkas pay ni Vice President Duterte ti saanna a pananganamong iti panangikabil ti Estados Unidos iti Typhon missile system ditoy Pilipinas.
Insuhesionna kitdi a rumbeng nga awan ti pilien a dasig ti Pilipinas ken balanse koma iti relasion iti sabali a pagilian.
