BAGUIO CITY – Nagkaykaysa dagiti umili ti tallo a barangay iti munisipyo ti Pinukpuk sadiay Kalinga a nangisayangkat iti tallo nga aldaw a serye ti ‘walk for peace rally’ nga addaan tema a “Lakad Tungo Sa Kapayapaan, Iwaksi ang Terrorismo at Karahasan”.
Paset daytoy ti Community Support Program ti 50th Infantry Battalion, Philippine Army kadagiti barangay ti Pinukpuk nga adaan impluwensia ti rebelde a New People’s Army ken saksakupen ti Ending Local Communist Armed Conflict programs.
Naisayangkat ti ‘walk for peace rally’ sadiay Barangay Baay idi Martes bayat a sadiay Barangay Limos idi September 23 ken sadiay Barangay Apatan ita nga aldaw.
Puntirya ti aktibidad a dinar-ayan ti nagduduma a sektor ti komunidad a maital-o ti panakikaykaysa ti amin para iti panakagibus ti kinaranggas ken mabuangay ti natibker a komunidad kontra kadagiti rebelde a grupo.
Kabayatan ti seremonya ket imbingay dagiti sigud a rebelde ti kapadasanda ken ti pudno a kinadakes ti rebelde a grupo.
