Napadayawan dagiti walo a women waste pickers iti kaleppas nga Ecological Waste Management and Sustainability Fair sadiay Malcolm Square wenno Peoples Park idi kalman.
Dagiti napadayawan a women waste pickers ket volunteers nga inrekomendar dagiti barangay iti syudad ti Baguio kas iti Guisad Central, Bakakeng Central ken daduma pay.
Ti agpidot kadagiti basura kadagiti babarangayda ti ar-aramiden dagitoy kasta met ti tumulong kadagiti garbage collectors.
Iti panakapadayaw dagiti waste pickers, naipakaamo ti dakkel nga akemda iti panagpatalinaed iti kinadalus ti aglawlaw iti siudad nangruna ket saan a makitkita ti ar-aramidenda.
Sigun iti maysa a miyembro ti Zero Waste Baguio, Inc. (ZWBI), dakkel iti maitultulong dagiti volunteers a mangirecycle kadagiti maal-alada a basura tapno sumayaat ti circular economy ti siudad.
Naipaayan dagiti waste pickers iti token ken certificates manipud kadagiti nagduduma a donors kas iti Environmental Management Bureau (EMB), Eco Waste Group, Tingi Group ken Global Alliance.
Gapu iti dayta, dakkel met ti panagyaman dagiti napadayawan nga indibidual.
Kabayatanna, kiddaw met dagiti opisyales ken dagiti nagduduma nga organisasyon ti agtutuloy ken panakanayon dagiti volunteers a tumulong a mangkita ken mangimanehar iti basura iti syudad ti Baguio. //Bombo Noveh Organo
