![](https://img.bomboradyo.com/baguio/2020/12/apayao-flood-.jpg)
BAGUIO CITY – Nakapasar ti sumagmamano a munisipyo ti Apayao iti panaglayos idi kalman gapu iti panagtudtudona.
Nupay kasta, kinuna ni Apayao Provincial Disaster and Risk Reduction Management Officer Jeoffrey Borromeo a kabaelandan a maimaton ti sasaaden ti probinsia iti kanito a mapasaran ti panaglayos.
Dinakamatna a naklaat dagiti low-lying areas ti Apayao iti nagpatpatnag a panagtudtudo idi Sabado ken Domingo iti saan a napintas a sasaaden ti panawen a nangitunda iti panaglayos.
Kinunana a dagus a naisayangkat ti panagbakwit ti 22 a pamilya a bukbuklen ti 88 nga indibidual sadiay Cabatacan, Pudtol ken panakaispak ken panagbakwit ti maysa a pamilya a bukbuklen ti lima nga indibidual a napupuk sadiay Allen, Pudtol gapu ti panagngato ti lebel ti danum.
Nailista ti panaglayos iti walo a barangay sadiay Apayao, partikular kadagiti barangay ti Cabatacan, San Mariano, Allen ken Imelda iti Pudtol; kadagiti barangay ti San Gregorio, Dagupan ken Shalom iti Luna ken iti barangay ti Santa Filomena sadiay Flora.
Nailistada pay ti panagregaay ti daga iti deppaar ti Claveria-Calanasan Road.