Nagbakwit dagiti walo a pamilya a bukbuklen dagiti dua pulo ket innem nga indibidual idiay Barangay Gobgob, Tabuk City ita nga aldaw gapu paylaeng iti typhoon Nika.
Sigun kenni Gobgob Punong Barangay Jerry Dumayag, nagbakwit dagitoy agsipud ta narisgo wenno delikado ti nakaipatakderan dagiti pagtaengan dagitoy.
Kinunana nga agnanaed dagitoy kadagiti bambantay a paset ti nasao a lugar a narisgo iti panagreggay.
Innayonna metlaeng a naaramid ti pagtaengan dagitoy kadagiti lights materials rason a nalaka daytoy a madadael.
Iti agdama, temporaryo nga agnanaed dagitoy iti Gobgob Elementary School sadiay metlaeng Tabuk City.
Kabayatanna, agtultuloy met ti panagmonitor dagiti maseknan nga otoridad iti sitwasyon partikular kadagiti bambantay a lugar iti posible a panagbakwit dagiti dadduma a residente.
