BAGUIO CITY – Mapatta-patta a dumanon iti walo nga ektarya ti pakabuklan a paset ti bantay ti nauram sadiay Bokod, Benguet itay nabiit.
Dimmanon met iti maysa nga aldaw sakbay a nasebseban ti nasao nga uram idi kalman ti agsapa.
Iti panakiuman ti Bombo Radyo Baguio, kinuna ni Fire Officer 1 Braken Bumacasa manipud iti Bokod Fire Station a daytoy ti maikadua a kadakkelan a nailista a kaso ti uram iti agdama a tawen.
Kasaruno daytoy ti panakauram ti sabali pay a paset ti bantay idi napalabas a lawas a nakauraman ti agarup sangapulo ket lima nga ektarya.
Inaklon ni Braken nga agkurkurang ti personnel ken materyales dagitoy a nagresponde kadagiti napasamak nga uram.
Kinunana a lima laeng a drum ti linaon ti truck dagitoy rason a nalaka a maibos ti danum a karga daytoy iti uneg laeng ti tallo agingga uppat a minuto.
Iti agdama ket manarimaan paylaeng ti imbestigasyon dagiti kameng ti Bureau of Fire Protection para iti panakaduktal dagiti pakabuklan a danyos iti napasamak nga insidente.
