Napilaan ti show cause order dagiti walo(8) nga employers kabayatan ti maikauppat a simultaneous Run After Contribution Evader(RACE) campaign nga insayangkat dagiti kameng ti Social Security System- Baguio kagiddan ti panakalagip ti Labor Day.
Iti panakiuman ti Bombo Radyo kenni Christian Andrew Rillorta, Regional Communications Officer ti Social Security System Luzon North 1 Division, dumanun iti 236 nga empleyado ti naapektaran iti saan a panangiremit dagiti employer dagitoy iti kontribusyonda iti nasao a social insurance program.
Pakabuklan met a Php9.7 -million ti gatad ti koleksyon a masapol a bayadan dagiti walo nga employer sangapulo ket lima(15) nga aldaw kasaruno ti panakaipaay ti notice of violation kadagitoy.
Sigun kenni Rillorta, karaman kadagiti pinaayanda ti show cause order ket sumagmamano kadagiti restaurant, laundry shop, hotel, ken construction services iti siudad.
Dinakamatna a kadawyan a rason dagiti employer iti saanda a panagbayad kadagiti kontribusyon dagiti empleyadoda ti nagbalin nga epekto ti pandemya iti kompanya dagitoy.
Nupay kasta, imbinglay ni Rillorta nga adda ti programada para kadagiti delinquent employers tapno makapagcomplyda ken maipaayda kadagiti empleyadoda ti benepisyo dagitoy.
Mainaig iti dayta, inlawlawag ti nasao nga opisyal a maipaima iti legal department dagiti delinquent employers a saan a mangikaskaso iti naipaay kadakuada a show cause order.
Kabayatanna, saan nga ipakpakaammo ti nasao nga opisina ti pangisayangkatanda iti nasao a kampanya tapno maliklikan ti panagsagana dagiti employer nga aglablabsing.
Ti Run After Contribution Evader(RACE) Campaign ket isaysayangkat dagiti kameng ti Social Security System- Baguio nu sadino, panggep daytoy a siguradwen nu agtultulnog metlaeng dagiti employer kadagiti pagrebbenganda kas maitunos iti Social Security Act of 2018.//Bombo Rob Dominguez
