Impatungpal ti administrasion ni sigud a President Rodrigo Duterte ti “war on drugs” tapno maisalakan dagiti agtutubo ken malapdan ti panagbalin ti Pilipinas a “narco-state.”
Daytoy ti kinuna ni Senador Ronald “Bato” Dela Rosa bayat ti panagkampaniana sadiay Ermita, Manila idi laeng kalman.
Sigun kenni Dela Rosa, sakbay isuna a nagbalin a senador ken sakbay a nagbalin a presidente ni Duterte, naobserbaranda nga adda dagiti probinsia a kontrol dagiti drug lords, ngem saan a dinakamat ti senador nu anya a probinsia dagitoy.
Ni Dela Rosa ket sigud a hepe ti Philippine National Police bayat ti adminstrasion ni Duterte.
Immunan a kinunana a ti “drug war” ket napateg.
Kabayatanna, agtaltalinaed ti takder ni sigud a President Duterte a saan nga agpadispensar iti war on drugs bayat ti panagtakemna kagiddan ti panangibagana a responsibilidadna amin ti nasao a banag.
Maibasar iti rekord ti gobierno, agarup 5,000 a drug suspects ti napapatay bayat ti anti-drug police operations.
Nupay kasta, nabilang dagiti human rights groups ti 30,000 a drug suspects a napapatay, pakairamanan ti 17-anyos a ni Kian Delos Santos a napapatay idi 2017 babaen kadagiti polis a nangtiliw kenkuana.
