BAGUIO CITY – Agserbi a karit iti Simbaan Katolika dagiti nagbalin a waragawag ni Presidente Rodrigo Duterte kontra kadakuada ken iti Diyos tapnu agbalinda a nasaysayaat a simbaan ken nasaysayaat a Katoliko.
Nagbalin a reaksiyon daytoy ni Fr. Manny Flores, dadaulo ti Commission on Social Action ti Diocese of Baguio-Benguet iti nasao a pakaseknan iti panakiyuman ti Bombo Radyo kenkuana.
Inaklonna a napasaktanda kadagiti nagbalin a waragawag ni Presidente Duterte kontra iti Simbaan Katolika ken iti Dios ngem saanda nga itulok a mangitunda daytoy iti panagsakit met ti nakemda nga agresulta iti panagkayatda met nga agbales.
Kinunana nga imbalakad ti Obispo ti simbaan iti pastoral statement daytoy ti saanda a panagaramid iti wagas ti lubong a ‘mata iti mata ken ngipen iti ngipen’ wenno panagbibinnales.
Innayonnaa karkariten ti Obispo dagitoy iti panang-aramidda ketdi iti amin a kabaelanda tapnu ibiagda ti pammatida nga addaan dignidad ti Kristiyano a maitunos iti pagayatan ti Diyos.
Dinakamat pay ni Fr. Flores nga ituloyda laeng ti nasayaat nga aramidda para iti pagsayaatan ti lubong ken dagiti komunidad a tultulongan ti simbaan ken saanda a maupay gapu laeng iti nasao nga isyu.
