Maur-uray laengin ti ipaiyulog ti maseknan a korte a warrant of arrest tapno maiserbi kadagiti suspect iti kaso a robbery with homicide idiay Barangay Fairview, Baguio City idi December 5, 2023.
Iti panakiuman ti Bombo Radyo kenni Police Major Harriet Bulcio, Public Information Officer iti Baguio City Police Office, nabigbigdan dagiti tallo a suspect ken ti maysa pay a kadwa dagitoy ngem saanen a nadakamat ti naganda.
Kagiddan dayta,kidkiddawen ti nasao nga opisina ti panakapapartak ti panangipaiyulog ti korte iti warrant of arrest kontra kadagiti suspect tapno saanen unay a makaadayo dagitoy.
Iti baet dayta, impasigurado ni Police Major Bulcio nga agtultuloy ti panangimonitorda iti lokasyon dagiti suspect.
Maipalagip a idi napan a tawen ket pinapatay dagiti suspect ti biktima a ni Kamille Biscocho, 29-anyos, ina ti 2-anyos nga ubing.
Immunan metten a nakapatang ti Bombo Radyo Baguio ti asawa ti biktima a ni Lucky Bryan Biscocho idi Enero ti agdama a tawen nu sadino, ipukpukkawna ti hustisya para iti pimmusay nga asawana.//Bombo Rob Dominguez
