Impetteng tiEnvironmental Management Bureau- Cordillera a nasken nga ingetan dagiti tunggal babbalay ti waste segregation tapno masolusyonan ti kumarkaro a parikut iti basura.
Sigun kenni EMB-CAR Regional Director Jean Borromeo, napateg nga ipatungpal ti umno a pangisina kadagiti basura ken irecycle dagiti mabalin pay a mausar a materyales.
Guyguyuguyenna metlaeng dagiti lokal a gobierno a mangipasa iti ordinansa para iti composting pit iti tunggal balay para iti biodegradable waste, bayat a ti residual waste ket iturong iti landfill wenno aramaten kas alternative fuel.
Maibasar iti datus ti Environmental Management Bureau- Cordillera, dumanon iti 719,978 a kilo ti basura ti mapatpataud iti rehion tunggal aldaw nu sadinno ti siudad ti Baguio ti kaaduan iti basurana.
Impaganetget ni Borromeo a ti waste management ket responsibilidad ti amin, ken ti panagtulnog iti linteg ket para iti pagimbagan ti amin.
Immunan a naideklara babaen iti Proclamation No. 760 ti Enero kas Zero Waste Month, nga addaan iti tema a “RA 9003@25: Honoring our past, renewing commitments, innovating for a cleaner tomorrow.”
