Posible a maideklara ti water crisis nu agtultuloy ti kinakurang ti danum idiay Itogon, Benguet gapu iti mapaspasaran nga epekto ti El Nino phenomenon.
Iti interview ti Bombo Radyo kenni Cyril Batcagan, dadaulo ti Municipal Disaster Risk Reduction Management Office-Itogon, mariknadan ti panagkurang ti suplay ti danum iti irigasion kasta met iti bawasa a maar-aramat para iti inaldaw a kasapulan dagitoy.
Gapu iti dayta, agpapasakdo laengen dagitoy kadagiti private water delivery truck tapno maipaayan dagitoy ti danum.
Nupay kasta, aklonen ni Batcagan a saan nga umdas ti danum a nagtaud kadagiti water delivery (truck) gaputa kurang dagiti water trucks a maar-aramat tapno maiwarasan amin a babbalay sadiay.
Dagiti kangrunaan a makapaspasar ti kinakurang ti danum ket ti Barangay Tuding, Ucab, Ampucao, ken Barangay Loacan idiay munisipyu ti Itogon.
Kinuna ti nasao nga opisial a posible pay a maapektaran dagiti pagay pakairamanan dagiti mula a natnateng nu saan nga agtudo ken bumayag ti napudut a paniempo nangruna iti barangay Tinongdan ken Dalupirip, iti nasao metlaeng a munisipyu.
Maibasar iti datos ti nasao nga opisina, awan paylaeng ti naireport kadakuada a gatad ti nadadael a mulmula gapu iti epekto ti El Nino gaputa ingagara dagiti mannalon sadiay a saan nga agmula gaputa ammuda nga agkurang ti danum.
Kabayatanna, kiddaw ni Cyril Batcagan ti kanayunan a pannakaiyaramid ti irigasion iti nasao a lugar paturong kadagiti taltalon tapno ad-adda a nalangto ken nasayaat ti apit dagitoy a mulmula a kas ti pagay ken natnateng.///BenjoGuzman
