Sumaysayaat ti sitwasyon ti suplay ti danum iti Baguio City nu idilig kadagiti napalpalabas a tawen.
Iti interview ti Bombo Radyo kenni Engr. Salvador Royeca, General Manager ti Baguio Water District, agtultuloy a manaynayon dagiti water sources ken production capacity ti Baguio Water District ita a tawen.
Gapu iti daytoy, panggep ti nasao nga opisina a mapagtalinaed ti umdas a suplay ti danum iti umadanin a summer season.
Sigun kenni Royeca, tuttutukan ita ti opisinada dagiti barangay nga addaan iti nababa a suplay ti danum wenno dagiti mabigbigbig a problematic areas tapno maipasigurado ti umdas a distribusyon ti danum.
Innayon ti nasao nga opisyal nga agtultuloy ti ipatpatungpalda a Water Safety Plan kas maysa a Category A utility provider tapno maliklikan ti kontaminasyon ken mapagtalinaed ti napintas a kalidad ti danum.
Malaksid iti daytoy, dinakamat ni Royeca a manarimaan ti panangsukatda kadagiti daan wenno nabayagen a pipelines, mapadpadakkel dagiti linya kadagiti lugar nga addaan iti nangato a populasyon ken palpalawenda ti serbisyoda kadagiti elevated areas nga addaan iti limitado a suplay ti danum.//Rizza Gwen Doñamal, Local news correspodents
