BAGUIO CITY – Dedepensahan ng undefeated Ifugao boxing sensation na si Carl Jammes Martin ang kanyang titulo na World Boxing Association (WBA) Asia Bantamweight Champion sa October 27 sa Lagawe, Ifugao.
Susubukan naman ng WBF Asia Pacific Super Bantamweight Titlist na si Moon Chul Suh mula South Korea na agawin ang nasabing titulo ni Martin.
Dahil dito, tinututukan ngayon ng coaching staff ng 19-anyos na kampeon ang mga bagong technique at kombinasyon na gagamitin niya sa paghaharap nila ni Moon na main event ng “Bangon CORDILLERA the Fight Continues” ng Ifugao Amateur and Professional Boxing Promotion.
Hawak ni Martin ang boxing record na 10 wins (9 knockouts), 0 loss at kung mananalo siya laban kay Moon ay pwede siyang makapasok sa WBA Bantamweight World Rankings.
Hawak naman ni Moon ang boxing record na 5 wins (4 knockouts), 6 losses at 3 draws.
Maaalalang sa huling laban ng Igorot boxing champion ay napanatili niya ang kanyang titulo na WBO Oriental Youth Bantamweight Champion laban kay Huerban Qiatehe ng China.
Sa ngayon, hawak din ni Martin ang WBO-Asian Boxing Council Continental Bantamweight Belt, Interim Champion ng Philippines Boxing Federation Bantamweight Belt at ng Philippines Luzon Professional Boxing Association Bantamweight Belt.
