--Ads--
BAGUIO CITY – Nakuryente ti maysa a welder kabayatan ti panagtrabahona iti manarimaan a konstruksion ti Senate House sadiay Romulo Drive, Lualhati, siudad ti Baguio idi kanikadua.
Nabigbig daytoy a ni Denver Damaso Gorio, 27-anyos, baro ken tubo ti Kapangan, Benguet.
Maibasar iti report, kimmalay-at ti biktima iti alad nga addaan kangato nga agarip uppat a metro tapnu ikkatenna ti maysa nga steel bar.
Bumaba kuman daytoy idi aksidente a naisagid ti inikkatna nga steel bar iti maysa a live wire ti kuryente.
Nangitunda daytoy iti panakakuryente ni Gorio ken iti panakatnagna iti nasao nga alad.
Dagus daytoy a naitaray iti pagagasan ken ita ket adda ti biktima iti natalged a kasasaad.
