Nasebsebanen ti “wildfire” wenno uram a nagramaram iti southern part ti South Korea idi laeng kalman ti malem gapu iti panagregget nga inaramid dagiti otoridad.
Iti pannakiuman ti Bombo Radyo kenni Roel Toquero, BINC idiay South Korea, kinunana nga alas 5 ti malem idi kalman idi nasebseban ti uram.
Naobserbaran a nasayaat ti paniempo idi kalman kagiddan pay ti panagbayakabak ti tudo a nangpalubos met iti ad-adu nga helikopter nga agtayab ken mangibelleng iti danum, a nangpukaw iti gil-ayab ti apoy.
Maibasar iti datos, dumanon iti duapulo ket walo nga indibidual ti pimmusay bayat a nasurok tallo pulo ti nadangran, ken naapektaran ti 33,000 nga umili sadiay.
Iti abagatan a daya a rehion, nauram ti nasurok a 45,000 nga ektaria, sigun paylaeng kenni Toquero.
Maipalagip a nangrugi ti uram idi Marso 21, 2025, ken nagbayag ti maysa a lawas.
Kabayatanna, kinuna ni Toquero a saan a naapektaran dagiti Overseas Filipino Workers nga agtaltalinaed ken mangmangged sadiay.
