BAGUIO CITY – Naiwaragawagen dagiti nangabak iti Search for Excellence in Disaster Risk Reduction and Management ken Humanitarian Assistance ti Office of Civil Defense (OCD)-Cordillera.
Segun iti Office of Civil Defense-Cordillera, babaen iti desk evaluation ken field validation a naipatungpal idi napalabas a bulan ket nakualipikar ti uppat nga entries para iti national level.
Karaman iti daytoy ti Mt. Province iti sidong ti Provincial DRRM category, ti munisipio ti La Trinidad iti sidong ti MDRRMC 1st to 3rd Class category, Lepanto National High School iti Public-Rural school category, ken ti University of the Cordilleras iti Higher Education Institution category.
Makaawat dagiti nangabak iti plaques of recognitions ken P50,000 a cash nga aramatenda para kadagiti DRRM-related programs ken aktibidad dagitoy.
Ti Gawad KALASAG, wenno “Kalamidad at Sakuna Labanan Sariling Galing ang Kaligtasan” ket maysa a search nga agpangpanggep a mangallukoy kadagiti counterparts ken stakeholders a mangiyimplementar iti napateg a programa para iti disaster preparedness ken emergency management.
