Impaganetget ni George Garcia, Chairman ti Commission on Elections a nainget nga ipawpawil ti Commission on Elections (COMELEC) ti withdrawal of candidacy dagiti kandidato para iti May 2025 midterm polls, kalpasan ti maudi nga aldaw a panangipila ti certificates of candidacy inton Oktubre a otso iti agdama a tawen, no substitution ti rason iti withdrawal dagitoy.
Nupay kasta, mabalin a mayaplikar ti substitution no pimmusay ken nadiskualipikar ti maysa a kandidato, ngem para laeng daytoy kadagiti pamilia ken kapada a party list dagiti pimmusay ken nadiskualipikar.
Maipalagip nga immunan nga inwaragawag ti Commission on Elections a mabalin ti substitution agingga inton Nobiembre a kinse ita a tawen.
Ngem itatta, saanen a daytoy a maipatungpal tapno saan a mangitunda iti panakaiyaw-awan dagiti umili iti ibotosda.
