Impagetnet iti House prosecution a saan mabalin a ibilang kas “discredited witness” ni sigud a Davao police officer Arturo Lascañas gapo nga inlawlawagna iti sinapataanna a statement no apay nga inlibakna dagiti alegasion iti umuna a testimoniana iti Senate hearing idi 2016.
Sigun kenni House prosecution legal spokesperson Atty. Benjamin “Jay” Tolosa Jr., imbinglay ni Lascañas iti maika-dua nga affidavit a mapapati a na-coach kano isuna iti dadduma nga opisyales tapno ilibak dagiti alegasyon mainaig iti Davao Death Squad.
Innayonna pay a binabawi met laeng ni Lascañas dagiti immun-una a statementna gapu iti konsiensia ken panagbutengna iti kinatalgedna.
Impaganetget pay ni Tolosa a saan nga awtomatik a naawan iti kredibilidad ti maysa a testigo a nagbaliw iti statement.
Kinunana a napateg nga adalen ti gapo iti panagbaliw iti statement daytoy tapno makita no anya iti kapapapati mainaig iti daytoy a banag.
Inlawlawag pay iti prosekusyon a saanda insango ti affidavit ni Lascañas tapno mapaneknekan nga agpayso dagiti alegasyon no di ket tapno ipakita dagiti dokumento nga impangruna iti National Bureau of Investigation (NBI) iti imbestigasion iti mapapati a pangta kontra kenni President Ferdinand Marcos Jr.
Kabayatanna, imbinglay met ni impeachment adviser ken trial spokesperson Robert Ace Barbers a saan a mabalin a basta mailasin ti affidavit ni Lascañas ta nalawag a nailawlawagna ti rason ti panagbalbaliw ti testimonia.
Sigun kenkuana, ti panangaklon ni Lascañas nga nagulbod isuna ket mabalin latta a maibilang a “admission against interest.”
Impaganetget met laeng iti prosekusyon a saan napukaw ti legal a kinateg ti affidavit gapu laeng ta saan a notariado daytoy. //Bombo Khey Reparip
