Imbinglay ti Department of Education (DepEd) a mannarimaan ti panangpatibkerna iti work immersion program para kadagiti senior high school students iti pagilian.
Inyunay-unay ni DepEd Secretary Sonny Angara ti kinapateg ti work immersion kadagiti senior high school students gapu ta ditoyda a masuroan babaen kadagiti kapadasanda kadagiti nagduduma nga opisina wenno organisasyon.
Mainaig iti dayta, maipaulog ti DepEd Order No. 023, s. 2026 kas paset iti panangpatibker iti Senior High School (SSHS) Curriculum.
Sakopen ti nasao a direktiba ti amin nga SY 2026-2027 Senior High School students kadagiti pribado ken pampubliko a pagadalan a karaman iti SSHS (Strengthened Senior High School) pilot implementers.
Manamnama met a maipatungpal ti nasao a direktiba kadagiti nabatbati a senior high school iti entiro a pagilian para iti SY 2027-2028.
Iti sidung ti nasao a direktiba, agbalinen a mandatory ti work immersion kadagiti nangala iti Technical-Professional (TechPro) Track.
Kabayatanna, optional met ti work immersion para kadagiti nangala iti Academic Track.
Sigun iti DepEd, saan a rumbeng a lumampas iti walo nga oras tunggal aldaw ken lima nga aldaw ti work tunggal lawas ti immersion dagiti estudyante. Nabilin metlaeng dagiti pagadalan a regular a kitaenda dagiti estudyante dagitoy.
Malaksid iti dayta, kasapulan nga tingitingen dagiti pagadalan dagiti aramidenda nga agreement ken saan a rumbeng a libre ti pannakaideploy dagiti estudyante para iti nasao nga immersion.
Malaksid kadagiti pribado a kompanya, maguyguyugoy metlaeng dagiti pagadalan a maki-partner kadagiti ahensya ken opisina ti gobyerno.
